Увс аймгийн Тариалан сумын гуравдугаар багийн  Цалгар гэдэг газарт долдугаар 27-ны 15:00 цагийн орчим усархаг ширүүн бороо орсны улмаас бага насны хүүхэд мал хариулж явахдаа үерийн усанд урсжээ. Энэ тухай дуудлага тус аймгийн Онцгой байдлын газарт 18:30 цагт ирсэн байна. Дуудлагын дагуу алба хаагчид, сумын Засаг даргын Тамгын газрын ажилтнууд мөн өдрийн 20:10 цагт 12 настай, эмэгтэй У-г тус сумын Гүрэн хадны ам гэдэг газраас Сэртгэрийн ам хүртэл 20 километрт явганаар эрэн хайх ажиллагааг зохион байгуулсан боловч үр дүнд хүрээгүй байна. Иймд мөн өдрийн 22:30 цагт эрэн хайх ажиллагааг түр зогсоож өнөөдөр 06:00 цагаас эрэн хайх ажиллагааг эхлүүлжээ.