Олон улсын жүдо бөхийн холбоо “IJF”-ийн цуврал “Их дуулга” тэмцээний нэг “Баку-2025 гранд слам” тэмцээн эхэллээ. Тус “Их дуулга” тэмцээн  Азербайжан Улсын Баку хотод хоёрдугаар сарын 14-16-ны өдрүүдэд болох юм. Тус “Их дуулга” тэмцээнд 37 орны эрэгтэй 169, эмэгтэй 95, нийт 264 жүдочин барилдах мэдүүлэг өгсөн байна. Тус тэмцээний эрэгтэйчүүдийн 60 кг-ын жинд 20 тамирчин, 66 кг-д 25, 73 кг-д 32, 81 кг-д 33, 90 кг-д 26, -100 кг-д 16, +100 кг-ын жинд 17 жүдочин барилдах бололтой. Эмэгтэйчүүдийн 48 кг-ын жинд 20 тамирчин, 52 кг-12, 57 кг-д 14, 63 кг-д 11, 70 кг-д 18, -78 кг-д 8, +78 кг-д 12 жүдочин барилдах мэдүүлэг өгсөн байна. Манай улсаас эмэгтэй нэг, эрэгтэй дөрвөн тамирчин өрсөлдөнө.

ЭРЭГТЭЙЧҮҮДИЙН 60 КГ-ЫН ЖИНД Н.МЭНДСАЙХАН, М.ТЭРГЭЛСАР

        Эрэгтэйчүүдийн 60 кг-ын жинд 20 тамирчин байна. Манай улсаас өсвөр үеийн дэлхийн аваргын мөнгөн медальт Нямсүрэнгийн Мэндсайхан “В” хэсгийн нэгдүгээр тойрогт гоц мөргөн ялалт авсан. Харин хоёрдугаарт тойрогт түүнийг хүчтэй өрсөлдөгч Азербайжаны  Balabay AGHAYEV хүлээж байна. Хэрэв түүнийг ялж чадах юм бол “В” хэсгийн аваргын төлөө Украины Dilshot  KHALMATOV, Бразилын Chrystian Silva нарын хэн ялсантай барилдана. Энэ жингийн “D” хэсгийн нэгдүгээр тойрогт Мөнхжаргалын Тэргэлсар, Азербайжаны Murad Muradli-тай таарсан. Хэрэв түүнийг хожиж чадах юм бол хоёрдугаар тойрогт амаргүй өрсөлдөгч Бельгийн Jorre VERSTRAETEN-тай барилдах юм.

ЭРЭГТЭЙЧҮҮДИЙН 66 КГ-ЫН ЖИНД Б.НЯМРЕНЧИН, А.АЗБААТАР,Э.БИЛЭГТ

       Эрэгтэйчүүдийн 66 кг-ын жинд 25 тамирчин барилдана. Манай улсаас тус жинд барилдах Бадамрагчаагийн Нямренчин “А” хэсгийн нэгдүгээр тойрогт  Германын Martin SETZ-тэй таарсан. Хэрэв түүнийг ялж чадах юм бол хоёрдугаар тойрогт Японы Takeshi TAKEOKA-тай барилдана. Энэ жингийн “С” хэсгийн нэгдүгээр тойрогт Алтанхүүгийн Азбаатар, Монтенегро Улсын Jusuf NURKOVIC-той таараад байгаа. Хэрэв түүнийг ялж чадах юм бол хоёрдугаар тойрогт Японы Ryoma TANAKA-тай барилдана.  Тус жинд АНУ-ын нэр дээр барилдах, 19 настай  Эрдэнэцогтын Билэгт “В” хэсгийн нэгдүгээр тойрогт Казахстаны Adilbek BERIKULY-тай таарсан байгаа. Хэрэв түүнийг ялж чадах юм бол хоёрдугаар тойрогт Испанийн David GARCIA TORNE-той барилдана.

ЭМЭГТЭЙЧҮҮДИЙН 52 КГ-ЫН ЖИНД Б.УРАНЗАЯА

      Эмэгтэйчүүдийн 52 кг-ын 12 тамирчин барилдах мэдүүлэг өгсөн байна. Манай улсаас энд жинд залуу тамирчин Баянмөнхийн Уранзаяа барилдана. Тэрбээр “В” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт “В” хэсгийн аваргын төлөө Испанийн Ayumi LEIVA SANCHEZ-тай барилдах юм. Хэрэв түүнийг ялж чадах юм бол хэсгээсээ нэгээр гарч  шөвгийн дөрөвт үлдэх боломжтой болно. "Баку-2025 Гранд слам"-ыг "С1" телевизээр хоёрдугаар сарын 14, 15, 16-ны өдрүүдэд үдшийн 21.00 цагаас албан ёсны онцгой эрхтэйгээр эх орон даяар шууд дамжуулна.