УИХ-ын чуулганаар “Төрөөс мөнгөний бодлогын талаар 2023 онд баримтлах үндсэн чиглэлийн төсөл”-ийн талаар хэлэлцэж байна.Энэ үеэр УИХ-ын гишүүд асуулт асууж, хариулт авч байна. 

УИХ-ын гишүүн Ц.Идэрбат: Ард иргэдийн дунд үйлчилгээний хураамж гэж нэг хувийг авдаг талаар гомдол их байна. Үүнийг ямар шалтгаанаар авч байгаа вэ гэхээр “Зээлийг гаргахад зарцуулсан зардал” гэж тайлбарладаг. Энэ дээр тодорхой тайлбар авмаар байна. Мөн Монголбанк дээр зээлийн мэдээллийн сан гэж зүйл бий. Үүний үүрэг, ач холбогдол нь  юу вэ. Иргэдээс маш олон гомдол ирдэг. “Үүрэн холбооны сүлжээ буюу утасныхаа төлбөрийг төлж, амжаагүй байхад хүртэл хар жагсаалтад нэрийг нь шилжүүлдэг. Үүнээс болоод дараа дараагийн үйлчилгээ авахад хүндрэл үүсдэг.  Энэ асуудлыг хэрхэн шийдэх вэ.

Монголбанкны ерөнхийлөгч Б.Лхагвасүрэн: Үйлчилгээний хураамж, шимтгэлтэй холбоотой асуудал байгаа.  Хуулиараа банк шимтгэл хураамж авах ёстой. Монголбанкны зүгээс дээд хэмжээ нь нэг хувь байхаар зохицуулалт хийсэн. Жишээлбэл, Ипотекийн зээл дээр энэ нэг хувийн хураамжийг аваад, явж байгаа.  Энэ хураамж нь хэр үндэслэлтэй вэ гэдэг дээр Монголбанкны зүгээс дахин тооцоо, судалгаа хийнэ.  Энэ хураамж буурах магадлалтай гэж харж байгаа. Харин зээлийн мэдээллийн сангийн гол үүрэг нь санхүүгийн сахилга батыг хэвшүүлэхэд оршдог.  Олон банк дээр зээл давхардуулж авахгүй байх тал дээр зохицуулалт хийдэг.