Байнгын хорооны хуралдаанаар УИХ-ын Т.Аюурсайхан Зам, тээврийн сайд Л.Халтарыг шүүмжиллээ. Тэрбээр “Дарханы замтай холбоотойгоор иргэдээс маш их гомдол ирж байна. Ганц зам засаж чадахгүй улс гэж байх уу. Энэ зэргийн ажлыг яагаад хийж чаддаггүй юм бэ. Салбарын сайдын ажил шүү дээ. Арай хэтэрч байна. Заавал Ерөнхий сайд очих ёстой юу. Иргэд Засгийн газрын зарим сайдад хариуцлага тооцохыг биднээс шаардаж байна. Тэдний эхэнд Л.Халтар сайдыг ярьж байн лээ. Болж, бүтэхгүй бол ажлаа өгөхөд яадаг юм. Юунд нь цууралддаг юм бэ. Шулуухан уучлалт гуйгаад ажлаа өгөх хэрэгтэй. Яагаад ширэн нүүрлээд суугаад байдаг юм. Гүйцэтгэгч нараасаа яагаад ажлаа шаардаж чаддаггүй юм. Эсвэл дундаа ороод янз бүрийн юм өгч, авсан юм уу. Та ийм зүйл бодоход хүргэж байна шүү дээ. Хэчнээн жил иргэд амь, эд хөрөнгө, цаг хугацаагаараа хохирох ёстой вэ” гэлээ.