Хууль зүйн байнгын хорооноос УИХ-ын хаврын чуулганы хугацаанд хийсэн ажлын тайланг танилцуулж байна. Энэ үеэр Зохиогчийн эрхийн тухай, Барааны тэмдэгт, патентын тухай, Хүний эрхийн тухай хуулийн талаар УИХ-ын гишүүн Ц.Мөнхцэцэг мэдээлэл өглөө.  Тэрбээр “Зохиогчийн эрхийн тухай хуульд урьд өмнө зохицуулж чаддаггүй байсан зүйлсийг зохицуулахаар тусгасан. Тухайлбал, мэдээллийн технологи, IT хэрэглээ, цахим орчин, мэдээллийн олон суваг, телевизийн өргөн нэвтрүүлгийн сүлжээ гээд олон талбарт зохиогчийн эрхийг хамгаалах, аж үйлдвэрийн хөгжил, олон улсын худалдааг дагаман Монгол Улсын иргэдийн зохиогчийн эрхийг баталгаажуулах, патентжуулах асуудлыг зохицуулсан. Энэ хуульд оруулсан онцлох зүйл заалт бол “Тухайн уран бүтээлийг худалдан авсан хоёрдагч этгээд бүтээлийн ашгийн таван хувийг анхны зохиогчид өгөх” тухай заасан” гэлээ.

  Манай улс анх 1993 онд Патентын эрхийн тухай хуулийг баталж, хоёр удаа шинэчлэж байжээ. Тэрбээр энэ тухай “Олон улсад монгол уран бүтээлчдээ дэмжих, үндэсний үйлдвэрлэлийн бүтээгдэхүүнээ дэмжих зорилгоор олон улсын зах зээлд нийцэх патентын эрх зүйн орчин бүрдүүлсэн” гэлээ. Мөн энэ хаврын УИХ-ын чуулганаар цэрэг амь насаа алдсан хэрэгтэй холбоотойгоор цэргийн салбар дахь дүрмийн бус харилцаа буюу дэгийг үгүй болгох талаар Зэвсэгт хүчний жанжин штаб, Хүний эрхийн комисстой хамтран тогтоол журам гаргахаар ажилсан тухай мэдээллээ.