Коронавирусийн нөхцөл байдлын улмаас Замын-Үүд баяр наадмын өдрүүдэд хэсэгчилсэн хөл хорио тогтоож, хилээ хаагаад байсан. Тэгвэл өнөөдөр буюу долдугаар сарын 16-наас хилээ нээж, цагийн хуваарийн дагуу ажиллахаар болсон байна.

Түүнчлэн өнгөрсөн долоо хоногт Монгол Улсын Засгийн газраас Дорноговь аймгийн Замын-Үүд дэх нөхцөл байдлыг сайжруулахаар шинэ ажлын хэсгийг томилон ажлуулж эхэлсэн. Тэгвэл Замын-Үүд дэх шинээр томилогдсон Гаалийн газраас өнгөрсөн тав хоногийн хугацаанд дараах шийдвэрүүдийг гаргаж, эхний ээлжийн гацааг арилгаад байгаа билээ.

Үүнд:

• Замын-Үүд дэх Гаалийн газрын хуучин ажиллаж байсан албаны дөрвөн дарга, 28 байцаагчийг сэлгэн, Улаанбаатар хотоос 32 ажилтныг шинээр томилсон.
• Замын-Үүдэд төрийн алба хаагчдаас шалтгаалсан ачаа барааны бөөгнөрлийг цэгцэлж, гаалийн хяналтын бүсэд гацаад байсан ачааны 200 авто машиныг шуурхай бүртгэл, хяналт хийн гаргасан.
• Баяр наадмын амралтын өдрүүдэд хил хаагдсан байгаа ч БНХАУ-аас ачаа тээврийн галт тэргээр бараагаа зөөх ажлыг эхлүүлсэн.
• Замын-Үүд дэх 12 тэрминал хяналтын бүсийг өдөрт хоёр удаа ариутгах ажлыг тогтмол хийж эхлээд байгаа талаар Замын-Үүд дэх Гаалийн газраас мэдээлсэн юм.